Anisakis hainbat arrainetan aurkitzen den parasitoa da eta gizakiak sabeleratzen duenean, digestioko arazoak sor ditzake edo, are, alergia sorrarazi. Baina ez gara beldurtu behar, ezta arraina gure dietatik kanpo utzi ere. Ezta pentsatu ere! Egin behar duguna anisakis agertzea saihesteko prebentziorako hainbat urrats jarraitzea da edo, hartzera iritsiko bagina, sintomak hautematen jakitea, konponbidea jartzeko.

Legatza izaten da anisakiak gehien eragiten dion espeziea. Anisakiasia eragiteko arrisku gehien sortzen dutenak gordinik, marinatuta edo bero-tratamendurik gabe jaten direnak izaten dira, hala nola antxoa (leku batzuetan bokeroi edo bokarte izenarekin ezagutzen dena), sardina, berdela, sardinzarra, izokina edo bakailaoa. Krustazeo batzuek ere, hala nola otarrainak eta karramarroak, sortzen dituzte anisakiasi kasuak, bai eta olagarroak, sepiak eta txipiroiak ere.

Hala ere, anisakiaz kutsatzeko, beharrezkoa da arraina gordinik edo tenperatura txikian prestatuta jatea. Horregatik, prebentziorako aholkuetako bat da arraina barruak 60ºC hartu arte prestatzea, batez ere arraina freskoa bada eta aldez aurretik izoztu ez bada.

Anisakiaz kutsatzea saihesteko beste modu bat da arraina aldez aurretik izoztea. Arraina etxean behar bezala izozteko, 20 Cº-ko tenperaturan edo txikiagoan hoztu behar du hozkailuan, eta gutxienez bost egunez eduki behar da arraina izoztuta. Horren tenperatura txikiak sortzeko gaitasuna duten hozkailu bakarrak hiru izar (***) edo gehiago dituztenak dira.

Bestalde, garrantzitsua da kontuan hartzea mikrouhin labean egosteak ez digula segurtasunik bermatzen, ez baita beti tenperatura homogeneorik edo gomendatutakoa baino altuagorik (60ºC) lortzen. Eta adi plantxan prestatzen badugu, ez baikara beti ondo erretzera iristen.

Halaber, gomendagarria da arraina ondo garbitzea eta erraiak lehenbailehen kentzea, etxera iritsi orduko edo erosteko unean bertan; BM supermerkatuetan eskaintzen dizugu zerbitzu hori.

Nola jakin dezaket anisakisaz kutsatuta nagoela?

Anisakis parasitoaz kutsatuta egotearen sintomak digestiokoak edo alergikoak izan daitezke; azkar azaltzen dira beti, arraina jan eta lehendabiziko 12 orduen barruan.

Digestio-arazoei dagokienez, sabelaldean kokatutako min bizia agertzen da, baita goragaleak eta okak ere. Sukar pixka bat ere azaltzen da.

Sintomek egun gutxi batzuez irautea izaten da ohikoena (gehienez ere, astebete), baina, kasu batzuetan, luzeago ere jo dezake arazoak.

Sintoma alergikoak ez dira horren ohikoak izaten, kasuen % 10ean azaltzen dira. Azaleko negela, arnasteko zailtasuna, asma, urtikaria arinak edo rinokonjuntibitisa.

Ze tratamendu behar du anisakisak?

Orokorrean, nahikoa izaten da sintomentzako tratamenduarekin; izan ere, denborarekin, berez desagertzen da infekzioa. Antiazidoak hesteetako arazoentzako eta antihistaminikoak edo kortikoideak arazo alergikoentzako.