Ondoegi gordetako sukaldaritzako sekretu horietako bat da kardua. Probatu dutenek, miretsi egiten dute, baina jende asko dago oraindik prestatzera ausartzen ez dena, baita ia ezagutu ere egiten ez duena.

Hasteko eta behin, argi utzi behar dugu –badaezpada– sukaldaritzan karduez hitz egiten dugunean, ez garela ari belardian paseatzerakoan horren gogaikarriak diren landare arantzatsu horietaz, nahiz eta familia berekoak diren, baita eguzki-loreak ere. Hala ere, gastronomian preziatzen dugun kardua –batez ere Europa iparraldean eta Mediterraneoan– Cynara cardunculus deritzona da, horren ezaguna den alkatxofaren hurbileko ahaidea.

Zona batzuetako menuetan, landare horren loreak erabiltzen dira, infusio gisa prestatuta, izen handiko gazta krematsuak egiteko gatzagi modura; hala nola, Extremadurako Torta del Casar gazta eta Queijo da Serra bezalako portugaldar gazta benetan goxoak egiteko.  Hala ere, gehien kontsumitu ohi dena da landarearen zurtoinen zatirik samurrena edo orri-mamiak.

Tradizionalki, arreta handiz garbitu behar izaten ziren landarearen atal horiek, horren gogaikarriak izaten diren iletxoak eta zuntzik zailenak kentzeko; baliteke, lan horrek ere pertsona batzuk atzera botatzea jaki goxo hori probatzeko saiakeran. Hala ere, gaur egun, kontsumitzeko errazagoak izateagatik hautatutako barietatean lantzen dira eta, gainera, bidea errazten diguten aurkezpen moduan aurki ditzakegu merkatuan: kardu garbia eta zatitua hutsean ontziratuta, izoztuta eta kontserban, esaterako.

Oso kaloria gutxiko elikagaia da, ur kopuru handia du eta kaltzio-iturri interesgarria da bazkarien artean. Hala ere, gehien aztertu diren ezaugarriak dira gibela babesteko eta hiperkolesterolemiaren aurka izan ditzakeen efektuak. Gainera, beste hainbat barazki bezala, gure hesteei lagunduko dien zuntz-iturri atsegina da.

Kontaezin ahala modu dago kardua prestatzeko. Arbendola-saltsarekin batera prestatzea da oso modu ohikoa eta goxoa:

 

  1. Egos itzazu karduak, zati handitan moztuta.
  2. Bitartean, xehatu ezazu arbendola eskukada bat baratxuri-atal pare batekin batera, almaizean.
  3. Nahasketa horri, gehitu karduen salda pixka bat, eta jarrai ezazu xehatzen.
  4. Bota nahasketa karduen lapikora.
  5. Zartaginean, salteatu beste arbendola batzuk baratxuriarekin, olio pixka batean.
  6. Zerbitza itzazu karduak arbendolazko saldarekin, eta bota gainetik salteatutako arbendolak eta bere olioa.