Askaria da, ziur aski, haur txikiak dituzten familiek arreta handiena eskaintzen dioten jatordua, gosariarekin batera. Kontuan izan behar da gaur egun dugun bizi-erritmoak seme-alabak ikastetxetako jantokietan utzi behar izatera behartzen dituela guraso asko eta, kasu horietan, arreta berezia eskaini behar zaie kontrolpean ditugun jatorduetan eskaintzen diegun jakiei.

Orain dela gutxi, haur oso aktiboentzako bost askari gomendatu genizkizuen blog honetan. Artikulu horretan, ideia batzuk jaso genituen, arratsalde erdian egiten den jatordu arin horiek askoz osasungarriagoak eta entretenigarriak izan daitezen geldi egon ezin duten haurrentzako, nahiz eta haur guztientzako balio duten aholkuak diren

Betiko ogitartekoa

Hemen planteatzen diren ideia orijinal guztien artean, ezin dugu ahaztu betiko ogitartekoari aplikatzeko ideiaren bat. Eta ohiko betegarriei irauli bat emateko truku batzuk ematen ditugun arren, betiko ogitartekoen aldeko aldarrikapena ere egin nahi dugu. Hori bat, beti bete beharreko premisa da betegarria askotarikoa izatea, eta produktu naturalak erabiltzea.

Astean zehar aldatu egingo dugu ogitartekoaren edukia: urdaiazpikoa, urdaiazpiko egosia eta indioilarra (100 gramo bakoitzeko % 10etik behera koipe dute) aukera egokiak dira umeen ogitartekoak betetzeko. Noizean behin, haurren artean horren ohikoak ez diren produktuak ere erabil ditzakegu, hala nola sardinatxoak, antxoak eta hegaluzea, produktu horien zaporera eta testurara ere ohitzen joan daitezen.

Eta tarteka ortuko produkturen bat jartzen badiegu, are hobeto: tomate-xerra bat edo letxuga eta tipula pixka bat, esaterako. Hegaluze ogitartekoa tomateaz, oliba-olio birjina estraz onduta, adibidez, oso erakargarria da.

Koipe kopuru handiagoko hestebeteak –txorizoa kasu– saihesten saiatu behar dugu, edo horien kontsumoa murrizten. Eta, jakina, baita horren desiratua den txokolatearena ere… Noizean behin gutizia modura eman diezaiekegu, noski, eta txokolate iluna baldin bada (% 70ko gutxieneko kakao portzentajea duena), askoz hobe.

Amaitzeko, sasoiko fruta-ale bat da aukerarik onena, nahiz eta esnekiak ere tarteka ditzakegun: jogurt naturalak edo gazta freskoa –irasagar pixka batekin– izan daiteke askariko ‘azkenbururako’ beste aukera on bat.