Ibiltzea da jarduera fisiko onuragarrienetakoa, erregulartasunez ibiliz gero. Adituen esanetan, nahikoa da egunean 30 minutuz ibiltzea (astean bost egunez) osasunean eraginak nabaritzeko: Kardiopatiak eta hipertentsioa izateko arriskua murrizten du; kolesterolari eta diabetesari aurre egiteko ona da; birika-edukiera eta hezur- eta gihar-dentsitatea hobetzen ditu; depresioaren aurkakoa da, etab.

Osasunaren Mundu Erakundeak gomendatutako ariketa izateaz gain, oso eraginkorra da pisua kontrolatzeko, eta beste ariketa gogorragoetarako trantsizio-jarduera egokia ere bada. Inpaktu txikikoa da, eta norberaren maila fisikora egoki daiteke (iraupena, abiadura eta ibilbidea); beraz, running egiten hasteko eta berriro hasteko aurretiko urrats logikoa da.

Korrikalari ohien artean, ohikoa da pentsatzea, hainbat urte korrika egin gabe daramaten arren, kirol-oinetakoak ‘erretzera’ atera daitezkeela zuzenean, atzo bertan zintzilikatu balituzte bezala. Korrika egiten duzun lehen aldia bada edo, nahiz eta hainbat maratoi egindakoa izan, urteak badaramatzazu entrenatu gabe, oinezko ibiltzeko ohitura sortu behar da korrika hasi baino lehen.

Behin hasten garenean, distantzia eta denbora kontrolatu behar dira; oro har, kilometro bat, oinez, 10 minutu baino gutxiagoan egitea lortzen dugunean, has gintezke running entrenamenduekin. Trantsiziorako onena da korrika eta oinez ibiltzea, txandaka (Ibili-Korrika metodoa). Adibidez, 2 minutu trostan eta lau minutu oinez (30 minutuz) eta, pixkanaka, gero eta denbora gehiago eskaintzea korrika egiteari eta gutxiago ibiltzeari.

Power walking: ibiltzearen eta korrika egitearen artean

Eraginkorragoa izan dadin, ibilaldi bizia izan behar da; saia zaitez erritmo konstantean ibiltzen, ahalik eta azkarren, belaunak jasoz, abdomena gogortuz eta besoak mugituz, abdomeneko eta bizkarreko giharrak ere aktibatzeko.

Power walking bezala definitu da teknika hau (martxaren nahiko antzerakoa da), eta ia baldintza guztietako pertsonek praktika dezakete. Hain zuzen ere, runningari gaina hartzen ari zaio azkeneko urteotan, dituen abantaila eta onurengatik, eskatzen duen esfortzu kardiobaskularra antzekoa baita (intentsitate-parametro parekideak alderatzen baditugu), inpaktu biomekaniko txikiagoarekin.

Abiadura funtsezkoa da: Pertsona heldu batentzako egokiena da ordu bakoitzeko 5-7 kilometro ibiltzea (kilometroko 8-12 minutu), British Journal of Sports Medicine aldizkariaren arabera. Lurrak ere badu eragina: maldan ibiltzeak izterrak, bernak, koadrizepsak eta gluteoak indartzen ditu.

Anima zaitez, ibiltzea ariketa perfektua da, eta runningerako jauzia eman nahi baduzu, helburu hori lortzeko tranpolin gisa balioko dizu.