Korri eginaz zure forma fisikoa hobetzea proposatu diozu zeure buruari? Argi-orduak aprobetxatu nahi dituzu gimnasiotik irten eta kanpoan running egiteko? Oso ondo, asmoa bikaina da, eta zure osasunak eskertuko du. Baina, nahiz eta jada zapatila egokiak izan eta denborak kontrolatzen eta erronkak proposatzen dizkizun aplikazioa deskargatu, orain galdera nagusiari erantzutea falta zaizu. Zein da eguneko unerik onena abian jartzeko?

Korri egiteko ordurik onena erabakitzeko hainbat faktore kontuan hartu behar dira, egokiena zure eguneroko ordutegiaren premietara egokitzea den arren.

Egunean zehar korri egiteak dituen abantailak

Egunean zehar, ordu-tarte asko dituzu hautatzeko. Goiztiarra bazara, goizeko lehen ordua luxu handikoa da endorfinak askatu eta lanera joan aurretik aktibatzeko.

Eguerdian korri egin nahi baduzu, airean kutsadura eta polen maila txikienak izango dituzu.

Lanetik ateratakoan korri egitea erabakitzen baduzu, lanaren ondoren ihes egiteko eta deskonektatzeko balbula aproposa dela ikusiko duzu.

Zure abentura-izpiritua ere atera dezakezu: ezagutzen ez dituzun zonetan sartzea, gauez iluntasuna medio alde batera utziko zenituzkeen parkeetan ibiltzea,…

Lotara joan aurretik, utzi behar adina ordu igarotzen, zure gorputza erabat erlaxatu dadin ariketa fisikoa egin ondoren.

Egunez korri egiteko aholkuak

Goizaren aldekoa bazara, kontuan izan lehen orduan gorputzaren tenperatura punturik baxuenean dagoela eta gorputzak ezer egin gabe orduak daramatzala eta muskuluak ez daudela oso malguak. Gogotik berotu organismoa aktibatzeko eta lesioak saihesteko.

Bereziki bero egiten duenean, hautatu transpirazio handiko arropa, eta ahal dela ez erabili kolore ilunak. Korrikalari askok, gainera, txanoa eta UV-tik babesteko poloak janzten dituzte.

Korri egitera ateratzeko, ondo hidratatu,  eta are gehiago beroarekin. Errendimendu hobea izango duzu eta metro bakoitzaz gozatuko duzu.

Eraman botila bat ur ibilbidean zehar edateko 30 minutu baino  gehiago korri egin behar baduzu, edo gutxienez egin geraldi tekniko bat zirkuituan iturria dagoen lekuan.

Errendimendurik handiena atera nahi baduzu, adituen ustez, 17:00etatik 19:00etara bitarteko ordutegian egoten da organismoa eraginkorrena.

Gauez korri egitearen abantailak

Beroa egiten duen garaietan, gauez running egitea ezin hobea da. Tenperaturak arinagoak dira, eta eguzki-erradiazioaren aurrean egotea eta beroaldi bat baino gehiago izatea aurrezten dugu.

Adituen arabera, potentzia muskularra eta biriken gaitasuna handiagoak dira, organismoak egun osoan zehar berotzeko aukera izan duelako.

Ordu egokia hautatzen baduzu, jende gutxiago egongo da kalean edo zure gustuko parkean. Era horretan, askoz ere gehiago gozatuko duzu!

Gure hiriaren beste aurpegia ikusiko dugu. Gaueko argiekin, zenbait hirik distira oso berezia izaten dute.

Gauez korri egiteko aholkuak

Ahal dela saiatu afaldu aurretik ateratzen, kalanbreak edo sabeleko minak ez izateko otordu handi baten ondoren.

Saiatu ibilbidea aurrez planifikatzen. Saihestu argi gutxiko edo lurrean irregulartasun handiko zonak. Estropezuren bat izan dezakegu ibilbidean dauden eragozpenak ez ikusteagatik.

Jantzi arropa koloretsua edo elementu islatzaileak dituena edo eraman argi eramangarri txiki bat ere, bereziki zure zirkuituan ibilgailuen zirkulazioko kaleak gurutzatu behar badituzu edo zure bidean txirrindulariak edo patinatzaileak ibiltzen badira.

Gorputzak 3 bat ordu behar ditu erabat erlaxatzeko neurrizko ariketaren edo ariketa biziaren ondoren, sortzen den adrenalina medio. Ahal den guztietan, ohera joan aurretik atsedenerako eta lasaitasunerako ordu batzuk hartu, gauean erabat atseden hartzeko.